شعر :: فرج محمد اغنيّه
ياروح تنبض في احشاي وكُلِّي
ماتغربي ياشمس
خلّك ديما
ياورد متنفّس عبير نسيمه
يا رقم صاعب عالعدو تقييمه
ياروح داخل روح كيفي وظلِّي
لا تغربي مادام درتك سيمه
وابنور وجهك بالغرام تحلِّي
فضِّي بالك
وخليك ديما شارفه بخيالك
وجودك حيا قلبي اللي متهالك
سكنتيه عرشه تربطي واتحِّلي
يا خايله ماغير زولك مالك
بيته وارضه قايسه بالمِــلِّي
لا ماتغيبي . !!
طز في القمر .. واللي يقول حبيبي
اللي في الشّهَر مرّرره ايطل نصيبي
وانتي نايره ديما وما اتغلِّي
يامهجتي يا من معاك لبيبي
يا مكمّله في التايهات ادّلِّي
يا لوّامه
يا ازوينتك في صبح بعد احلامه
ظلموك اهل الشعر والكَلاّمه
نسيوك … وانتي في الظلام اتجلِّي !
مانك سوا … والبدر كيف تمامه
يا وجهتي يا سفرتي ياخِلِّي.
