•  محمد الدنقلي .

طاح اجْلالها .. وانْحَلْ في طَغْوَةْ الرَّيح اخْلالها ..

وطاشَتْ جدايل شَعْرها .. وعين الغريب قْبالها ..

وتصرخ صوتها مبحوح .. مسفوح دَمْ عْيالها …

وكل حَدْ أمَّا تْكون ليه ..

والاّ يْخليها رماد .. وِيْقول : مالي ، ومالها ..

وطار حَمَامها .. وانْحَلْ بيدين الفساد احزامها ..

وبانتْ عَفَافة زِنْدها .. وقِشْعَتْ الريح احْرامها .

وين المحامي خلفها ، وين التريس قدّامها ..

وين ناسها ، وين أهلها ، وعقَّالها ، وأكرامها ..

تبكي دَمْ .. فوق الدَّمْ .. وترقد علي ملاّلها ..

وكل حَدْ أمَّا تْكون ليه ..

والاّ يْخليها رماد .. وِيْقول : مالي ، ومالها ..