• الأمجد بن أحمد إيلاهي

نحبّك وما عندي خواطر نقلّكْ

وخايف نعلّكْ

والبحر غدّار ، موجته ما تدلّكْ

******

نحبّك و ضايعْ

وبِيّا وْجَايِعْ

وساكت وصابرْ

وقلبي يْكْابِرْ

و توحشت حتى خيالات ظلّك

و نعرف إنو جوابي  وصَلّكْ !

******

نحبّك وغايِرْ وتاعب وحَايرْ

والحظ مقلوب كيف المصايِرْ

مطروز بالشوك و أعوج ودَايِرْ

يا ريق عطشان منهو يبلّك ؟ْ

والحب سجّان قادر يذِلّكْ .

******

نحبّك وخانت جميع المنابِعْ

هجرْنَا المرابِعْ

وندمت ما لقيت عندي صوابعْ

والنّدم جاني سادس وسابعْ

وجيوشْ مالحزن، وألفينْ تابِعْ

و مانيش خلّكْ

وكيفاش بعد إل جرى نَغفرلّكْ !

**********

نحبّك وصابر من وقت غابرْ

ومْحاصرْ وضاعت عليّ المعابرْ

وكي نخاف مالضعف نبدا نكابرْ

ومانسيت ظلّك

يا مخلّطة الروح كلّي بكلّك .