شعر شعبي :: فرج اغنية

نــارِي على #قــلب٠٠٠
ذايِــب ادّمــّر…..وجرحــه تخَمّــر…..

طايب على نارشوقه تحمّر.

نــارِي على #قــلب٠
يدلف نزيفه…. وكاثر رفيفه….

ينادي ايريد الفزع من ولِيفه ….

امهبّز على نار كيف الكنيفه…

وديما امسمّرْ ….عينى …

ولفراش كلّه امجمّــرْ.

نــارِي على #قــلب٠٠٠
كاثر اريافه…

وكُلّه حسافه…..

على زول

في الزِّين مبْهى اوصافه

وعُوده من الشوق واضح اصيافه

وياسه تأمّرْ…..

وهايم على صوت عزف المزمّـر

نــارِي على #قــلب٠٠٠
ماعاد حامل….. وجرحه تنامل

تهلّع اكبر لين داير دمامل

طبيبه بعد شاف حاله تحــامل…..
ابحِسّه تكَمّــرْ…..غطس فيه مافاد سابه امومّر

نــارِي على #قــلب٠٠٠
فايض انتاجه…وميِّس اعلاجه

مرهون في طب عند الخواجه

يادااي مامَرْ طعْمة الْحَاجه

على انسان طمــّرْ….سِــرّه ..

ومالْقِل ياسه تغمّــرْ !!

نــارِي على #قــلب٠
سدّه تخــرّم…..

وعِقْدَه تصَـرّم…..

تقطّع من الشّوق

كلّه تفَــرّم…..

مرهوون في زول امتّى ايتكَرّم

بيدّه ايشمّــرْ…صرحه بعد هَدْ يرجع معمّـرْ