• د / فريدة الحجاجي

موسوعة لا علمية تتناول مصطلحات اللهجة الليبية ولا تهتم بردة فعل القارىء

مصطلح الحلقة : ( العين ) وهي عضو الابصار عند الانسان وتُستعمل في اللهجة الليبية للتعبير عن اوصاف او حالات متعددة ومتباينة ليس لها احياناً علاقة بالابصار او بالبصيرة .. لنرى معاً :

* للطمع وعدم القناعة :
– يموت الحمار وعينه في الخلّة
– العين جيعانة والبطن شـبعانة
– العين ما يملاها الا كمشة تراب

* للازدراء وقلة الاحترام :
– قعد يشبحله بربع عين
– لما قابلها رخت عليه العين

* لوصف جمال المرأة :
– ما تملا منها عينك
– تحلّ العين المغمضة
– خودها وعيونك مغمضات

* للقسوة والتعذيب :
– طلّع له عيونه
– شنّقه من شفر عيونه
– قطّر له الثوم في عيونه

* المختفي عن الانظار :
– عين قابل
– عينك ما شافت سو

* للتكريم والتبجيل :
– على خاطر عيونك
– على العين والراس
– يشبح فيه بعين كبيرة
– العين ما تعلا على الحاجب

* للارتباك أو الهيبة :
– قام عيونه وحطّهم
– عين تضحك وعين تبكي
– ما قدرش ايقيم فيه عيونه

* لسوء الحظ أو الفال :
– خداته عين
– ضرباته عين
– جت فيه العين

* للعشق :
– حاط عليها العين
– ضارب فيها العين

* لسوء التصرف :
– ايدير فيها عيني عينك
– سيّبها بالعين وقصّها بالجره
– يغطي في عين الشمس بالغربال
– زي السردوك ما ينقب كان عين خوه

وكالمعتاد نختم الحلقة ببعض الرومانسية .. 
قال الشاعر :

نبعث تحايا خاطري و(عيوني)**للي عليا عزاز وايعزّوني
ونحسابك يا(عين) اعقلتي**من يوم حبّيتها زدتي هبلتي

الـى اللقــــــاء