علي بنناجي
يا نفس من كثر الڨلڨ ارتاحي
كثر الڨلڨ في الرأس يعمل دوشة
و لا تفرّحي الل يفرح بيوم طياحي
و بالك مع الدنيا تهزك شوشة
اللي ليك مترصد فكل نواحي
محضّر بلا سابق انذار جيوشه
و اني ليه لا نعنى و لاني صاحي
الدنيا فعيوني بالزهى مفروشة
فارد مع هبة الريح جناحي
النجم البعيد إن بان نبغي انوشه
..لا نبات لا نصبح على مطراحي
في وين نمرڨ بصمتي منقوشة
بالكي نبري علتي و اجراحي
و روحي على صراخ الوجع بكوشة
بضحكة سعادة الفجر نبدى صباحي
ببسمة رضى يغلڨ الليل رموشه
عايش و ناصب في العلي مركاحي
في أرض سمحة بالصفاء مرشوشة
لا نحير مالرڨاص لا الرداحي
لا سم ڨوله و لا فحيح ڨروشه
و و الله ما نجبد زناد سلاحي
اذا الصايدة أرخص من الكرطوشة
