بصوت مليان قهر وتعب، قال احد المواطنين: معاناة المية والمضخات ما اتمش … كل مرة عطل، وكل مرة انقطاع، وكل مرة المواطن هو اللي يجري ورا المسؤولين باش يلقى حقه.
وأضاف: المشكلة مش بس في المية… المشكلة إن المواطن ولى لازم يلم الناس ويطلع في فيديوهات ويناشد ويصيح، باش حد يسمع بيه ويتحرك، معقولة المواطن لازم يرفع صوته ويجمع الناس باش توصله خدمة من أبسط حقوقه؟
وتابع: المسؤول المفروض يعرف احتياجات المواطن قبل ما يطلع يطالب، ويتابع الأعطال قبل ما تتحول لأزمة، مش نستناو لين الناس تعاني وتصرخ وبعدها تبدأ التحركات.
وقال بحرقة: ليبيا ما تحتاجش مواطن يظل كل يوم يناشد ويستغيث… تحتاج مسؤول يقوم بواجبه، المية حق، والكهرباء حق، والخدمات حق، مش هدية من حد.
وختم: تعبنا من سياسة: ارفع صوتك باش نسمعوك، المواطن المفروض يلقى حقه بدون واسطة، وبدون تصوير، وبدون احتجاج، وبدون ما يضطر يجمع الناس باش المسؤول يتحرك.
يا مسؤولين… اخدموا الناس قبل ما تضطر الناس تصرخ.
