قبل العيد بأيّام كانت أمّ بسيسي تغزل في الزريبة جاها الفار قاللها خالتي أم بسيسي قالتلك أمّي عطيني الغربال .. قالتله برّا خود الغربال هوّينه في المطبخ مغطّية بيه الحليب وردّ بالك تشرب الحليب مشي الفار شرب الحليب ومسح شناب وخلاّ شناب وطلع لاقاته أم بسيسي قاتله : ليش شربت من الحليب..؟ نكر وحلَف قالت له: آهو الحليب عَلَيْ شنابك يا كَذّاب .. مادام غطَست فيه ما عاد نشرب منّه .. خدت المغرف وقعدت تجري في جرّته وضرباته ضربة قطعتله ذيله وهرب .. بعد أيام جاها قاللها يا خالتي أم بسيسي عطيني ذيلي نرقص بيه نهار العيد . قالتله لا .. قعد يجَّدَّى فيها.. وهي تقول .. لا لا لا بعدين قالت له: كانا تبِّي ذيلك.. برا جيب لي حليب من العَنْز. مشَى للعَنْز.. قال لها: يا عَنْز عَطيني حليب.. والحليب لأمّ بسيسي.. باش تعطيني ذيلي نرقص بيه نهار العيد. قالت العنز: برا جيب لي نبَق من السّدْره. مشَى للسّدْره.. قال لها: يا سدْرة عَطيني نبَق.. والنّبَق للعَنْز.. والعَنْز تعطيني حليب.. والحليب لأمّ بسيسي.. وأمّ بسيسي تعطيني ذيلي نرقص بيه نهار العيد. قالت السّدْره: برا جيب لي سَيل من الوادي. مشَى للوادي.. قال له: يا وادي عَطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب.. والحليب لأمّ بسيسي.. وأمّ بسيسي تعطيني ذيلي نرقص بيه نهار العيد. قال الوادي: برا جيب لي زَغْراتات من النَّجع ايزغرتوا عليا . مشَى للنَّجْع.. قاله :يا نَجْع عَطيني زَغْراتات.. والزّغْراتات للوادي.. باش يعطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب.. والحليب لأمّ بسيسي.. باش أمّ بسيسي تعطيني ذيلي نرقص بيه نهار العيد. قال النَّجع: برا جيب لي حولي (خروف)من راعي الغنم. مشَى للراعي.. قال له: يا راعي الغنم عَطيني حوَيلي.. والحوَيلي للنَّجْع.. والنَّجع يعطيني زَغْراتات.. والزّغْراتات للوادي.. والوادي يعطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب.. والحليب لأمّ بسيسي.. وأمّ بسيسي تعطيني ذيلي باش نرقص بيه نهار العيد. قال الراعي: ما نعطيكش خروف لين اتجيبلي الحطب مشى الفار المسكين دار الفاس على ظهره وبدى ايحطب ,,جاب الحطب للراعي والراعي عطاه الحولي والحولي عطاه للنجع والنعج عطاه للزغرتات والزغرتات عطنه للسيل والسيل عطاه للوادي والوادي عطاه للسدرة والسدرة عطاه النبق والنبق عطاه للعنز والعنز عطاته الحليب . . وعطا الحليب لأم بسيسي وأم بسيسي عطاته ذيله عيد بيه نهار العيد .