• محكيات .. سالم العالم

تشابه
إلى زوجتي فاطمة في عيد ميلادها اليوم
( 1 )
الوطن يشبهلك
وانتي تشبهي لأمي
وأمي فيها شبه مني
وأنا نشبه هبوب الريح
وفيّا شي م التربة
والنار تشبهني
والمطر واخذ أوصافي
ونتشابه أنا والجرح والغربة
( 2 )
الوطن ما نام فينا
وانتي نعسانة عيونك
وأمي تصحى قبل أذان الفجر
وانا غافي
فوق من صدر القوافي
نحلم إنّي …
نسقي بالنيران دمعة
ونغزل من الريح شمعة
وننحت من الطين شِعر
وعندي مع كثر المواجع صحبة
(3)
الوطن مش بس كلمة
وأمي لحن .. وأنتي نغمة
وأنا … حُطّي نقطة .
وأبدي من أول السطر
أنا لاني مبتدأ .. لاني خبر
لاني حال .. ولاني ظرف
أنا التشكيل يلّلي يرتسم فوق الحرف
ومتعتي نصنع من الكلام لعبة
(4)
الوطن ..وانتي ..وأمي
اْقلبو الصفحة عليا
واقروأ فيّا من جديد
أنا واو الجماعة
واللغة المسكوت عنها فيكم
أنا أول حكاويكم..
أنا أجمل أغانيكم..
أنا لحظة تجلّيكم..
أنا الإنسان…
وقراية الإنسان للإنسان مش صعبة
والطير لوْ تخلط عليه طيور
يموت.. وما يغردش خارج سربه
طرابلس
5 /1 / 2005
من ديوان ( محكيات )