شعر :: عمر عبد الدائم
(من ديوان المحكي)
أنغيب عليك .. بلعاني
نبيك تستاحشي أكثر
ونخفي صهد نيراني
ومالي صبر ..
وبنصبر
عشان أنحس لهفات الحنين فكل نبضة فيك
تغريني
ونبّي الشوق زي الليل
فعيونك يناديني
وكل ما تذكري أسمي
“عووومر”
ينزاد عُمر من الفرح ليا
وكل ما نخطر ف بالك
تتفتح ف صدرك
ألف جورية
ويوصلني غلاك .. ف بحة صوتك الحلوة
“مشتاقة يا عمري”
أنضمّ الطّيف
لين يغفى على صدري
نوشوش له :
ملهوف لك
ملهوف لك
لهفة سجين
لصبح حريّة
