• المهدي جاتو

(( اللا في زمن الكرونا ))
ـــــــــــــــــــــــــــــــــــــــــــــــــــ
ــ الللا من كثر ما تابعت في القنوات الفضائية بخصوص الكرونا ركبها الوسواس ، فقعدت أتشك في اي حاجة وبقت أتسيق في هذاك الحوش لين خلاته يضوي ضوي .. لكن وهي تمسح في الأرضية أمشمرا أيدها وثانية سروالها بهذاك الشبشب الصبع وسط المية أترش رشة عالحيط لين المية خشت للبريزة فقعدت أتنطط من الضي .. وين خش راجلها يحسابها ترقص مع الموسيقى إللي أمولعتها .
ــ لللا ثانية حتى هي شكاكة تغسل في كل شيء ومن ذكائها غسلت حتى الخضرة (بالسبيرتو) فعملت عملتها ورزرزت لين بدى أفراد العيلة كل يوم طايح واحد منهم ، فالدكتور ما فاتت عليه بنتيجة التحاليل بانت عملتها وأعترفت فقاللها الخضرة تنغسل بشوية خل أو ملح في المية مش يالسبيرتو والوركينا .
ــ اللا هذي نسرافة أمدايرتها عالمحلات ، لاخلت الغذائية ولا المنزلية ولا النشاف ولا حتى الكنادر ، وهذا كله قبل لا تبدأ جولتها وهي حاطة الكمامة على خشمها ، لازم أتمر على جاراتها بيت بيت ، تسأل وتقصقص وتقيد في أحوال الناس طرالها وجرالها .. وقالوا .. وقالوا .. فوحده زي هذي كان ركب فيها الفيروس لا قدر الله أتكون أحسن من ينشره والعياذ بالله .
ـــ راحت عليه الغلا أمتاع الكذب عند النسون ، قبل كورونا تلقاهن لما يتلاقن سلامهن كله بالبوس وتبيلهن ساعة بيش يوقفن السلام ، وفي الحقيقة تلقاهن مع بعضهن نار وبارود ، الوحدة منهن غير تلتفت فتبدى فيها الثانية تقطيع قرمة يا لطيف ، لكن توه البركة في كورونا إللي قالت رب ضارة نافعة .
ـــ الللا هذي كلما يروح راجلها للبيت تبدأ في التعقيم بالوركينة مقابض البيبان اوين يعطس يالطيف أتنط عالمنشف اتغطي وجهها ولما يحك بالصدفة راسه وإلا جسمه أتفنص فيه لين قريب عيونها يطلعن من الشك والريبة ، الراجل تحمل تحمل مشي جاب امرا ثانية وهكي جت منك يا جامع أقصد كرونا .