شعر محكي :: سالم العالم

سدّي

شقوق المزن

وشيلي

معايا الحمل

ما تفكري ف الوزن

وتعالي نتقاسموا بيناتنا …

هالحزن

خلّي عليك شوي

وخلّي عليا شوي

ما حد واخذ من الدنيا شي …

صبري وصبرك والمسافة والفقر..

ودموع النوارس والجرائد والصور..

وصوت المؤذن لما يذّن للفجر..

والمشي بعد العاشرة ليلاً حفيان علي شط البحر..

وأخر قصيدة ما كتبناها لبعضنا

 لإنعدام الوزن في غياب الشعر

ايييييه شن همك من اللي خاليين هموم

في ناس ليها المقدرة تغتال القصيدة

من قبل حتى تنكتب

 وفي ناس ما تنحني للعاصفة

ولا ينكسر فيها الحلم ولا تبيع بكرة ..

بأمس خلينا نتلاقوا ونتمشوا ع الرصيف

بعد ما تطيح الشمس ..

ونقولك إني أنا نحبك..

بلا معنى وتتشابك أصابعنا

ونضحك من مواجعنا وقولي لي..

مليت من هالكندرة اللي كعبها عالي

ومليت من صوت الغرام

مكتوب بحروف الهمس ..

ووين تسأليني..

ع القمر ما طل ح نقولك وايش

مالنا ومال القمر أحنا القمر

في ليلنا حتى القمر..

أصبح حلم وتعالي نتقاسموا بيناتنا

هالظلم خلي عليك شوي وخلي عليا شوي

ما حد واخذ من الدنيا شي