محمد أمين بن علي

غير اصبري ما عاد ما مازال

باقي من السبعة الشدايد عام

يمكن شبابك يا العزيزة ذبال

و تنكّرت لمواجعك ليّام

و يمكن سنين القحط جات تقال

و زادت على الجرح الطريّ آلام

لكن بشاير راسخة في البال

شاور عليها في الليالي منام

غدوة يتمّم رحلِتو لهلال

و يشهد على سبعة عجاف تمام

و غدوة تبدّل ثوبها لحوال

و يبڨى كلام اليوم غير كلام

غير اصبري هذا الزمن دجّال

مغرّق عيون الناس في لَوْهام

مراوغ كما شمس الشّتا ميّال

لا تعرفيه قعد ولّا قام

و فيه الثعالب عاطية على رجال

فيهم تعلّى بالخديعه امام

جرّبتهم ياما سنين طوال

ما لقيت غير السّم في لفّام

شواطين ما بين البشر انذال

ما يفيد في تبديلهم لِملام

و يا ريت كيف باعوا الشرف بالمال

لا زوّروا التاريخ لا لَعلام

لا تسلمي و لا تصدقي ليّ انڨال

يا غاليه.. هذا الزمن نمّام

يا غالية.. هذي عِصي و حبال

من كيد من صنعو الوَجَع الخام

غير اثبتي .. تلقي الحقيقة خيال

طلاسم يطرّز سرّها عزّام

و غير بسملي.. تو ينكشف في الحال

كل من تِلثّم بالخديعة لثام

و يا الوالدة يا ساكنة المخيال

عرفْتك عَزيزة.. و ليك عالي مقام

انت الغلا لْ ما تفسِّروش أموال

و لا يفسّرو تخمام في تخمام

و انت الوطن يمّا ل بِناتو رجال

ما يكيدهم في محبّتك لوّام

و لا يكيدهم ليل الأسى لو طال

و كِبست على جراحٍ لهم لعوام

على دمّهم جابوه لِستقلال

و لا همّهُمش الخوف مالإعدام

و لا همّهم ترحال في ترحال

مبين الثنايا رصاصهم حوّام

و كتبوا على جبين القدر مرسال

“لا شيّ غير الدم جاب سلام”

و ماني وليدك.. شاعرك.. موّال..

ما نطيقها الجهّال و  الظُلاّم

طبع النخل طبعي.. إذا ما طال

ترجع سَعَفتو حاشمة لقدّام

و يمّا وجع ما يفسّرو مكيال

معشّش على صدري الحزين أعوام

نخاف نتِكلّم تنجلي لهوال

و ينشب خِصام جديد فوڨ خصام

و نحشم.. نِحسّك واخذة في البال

مني.. و طبعك يا الغلا حشّام

و نحشم.. نفسّرلك كثير أمثال

و انت لْ غراَمك في الكِنين غرام..

و أنت لْ نِحبّك فوق كل خيال

و عندك طواف القلبِ و الإحرام

إذا قِسيت عليكِ راهو دلال

و ساعات ينفع مُرّها لالام

طبعي عنيد و نعرفو.. لاّ شال

ظيمٍ يسجّل شيلتو في زمام

و محال في محال في محال

نرضى بفُتات الكايدين لجام

ربي خلقني زمان من صلصال

و حرّم عليّ نذل زي لنعام

تعلّمت نقفل عالوجيعة اقفال

و نبري صُوابعها اليدين أقلام

و نرسم ألِف من عزّتي على شمال

و نحفر على يمينو كرامة لام

لام الشرف يمّا.. الڨلب مازال

مثبّت على نبض الكرامة خيام

و مازال ثمة أجيال عڨب أجيال

اتّرجم غلاكِ على الصّدور وشام

غير اصبري.. يمِّ العيون كحال

يا لابسة العزّة النفيسة حرام

غدوة يِترجم عزّتك موّال..

يوشوش قمر لليل حتى ينام..

و يرجع شبابك حال غير الحال..

و تمسح دموعك بالمحبة الشام..

و ينبت من الدرب البعيد أبطال

و يطلع من النار لْ هِفِت صْدام

ونذكّرك.. ما عاد ما مازال

باڨي من السبعة الشدايد عام

غير اصبري.. ما يْوَجّعك نبّال

ماليه ما بين الرجال مقام

انت الوطن.. إلّي عَلينا مال

و بمحبّتو.. و عبّا الصدور جمام. ..