سالم العالم
نحاول نلملم ما تبعثر مني
نحاول نلملمني
نلملم ما تشظى فيا ..
ونرمم ما بقى من وقت
بشوية أصحاب..
فيهم من يقدر يشكل فرق
ويعطي لضحكتك معنى
ويخلّص عليك القهوة
اللي تشربها بلا نية ..
واغلبهم سرقهم حزنهم منهم
وسكنتهم موجة قهر سلبية ..
ونقول لشوية حبيباتي
هللي مظلومات مني
واللي مخدوعات فيا
الواقفات بمحض الوقت
على حافة الذاكرة
الآيلات للسقوط
ظلماً وعدواناً
لأني أنا مش موجود أصلاً
في المكان الصح
……
تعالن نسند بعضنا
ونتكّى على بقايانا
بيش ما حدش منا يطيح
خارج قبره
وهيا يحاول كل حد منا
يختار له نجمة يلونها
ويكتبها باسمه
ويخطف له سبع ضحكات من عمره
وثلاث شموع
وصورة #لطارق_التائب
أو أيمن الاعتر
وربطة نعناع اخضر
وصفارة
وشريط لبو عبعاب
وخرزة زرقة
ويأخذهن معاه لبكرة
ممكن … ممكن … ممكن …
والله اعلم
طرابلس – 1/6/2009
من ديوان ( على جوك )
