شعر شعبي :: فرج اغنية

غاليّا واسع مرباعه ///// يِبذر وايخرّج في القاعه!!

…دايِــر مايبِّي
يملى وايفرّغ في عِبِّي
ينزل وايصبي
ايزعِّل وايرضِّي في ساعه

نيره من يدِّي
يفتل واينقِّض وايسدِّي
يلفى وايعدِّي
يمسح عالكبد الملتاعه

ماريتش كِيفه
لانعرف شتوه لا صيفه
مخضار خريفه !
ريحه اللي تبرم بوزاعه

يافيه علامه
بيته في صدري بارمامه
من غير كلامه
حاسس بفراحه واوجاعه

عجباته روحه
لابِقله واجد مربوحه
ماتفوت اطروحه
يلعب عالجّفوه ابّراااعه

فعيونه وااحه
يِّدّلِّل منقوش سماحه
كيــف الرّدّاحه
جوف الجضرانه البرطاعه

منقوش بزينه
بشفاه ورِقّة عِـرنينه
طوله يااعوينه
يجدب فِيّا كي البلاّعه

عنده شخصيّه
في اسلوبه ماهي عاديّه
ما عنده لِيّــا
يجــول من غير دناعه
خلّه يجــوّل
مايلقى كيفي نا لــوّل
عــارف مايطــوّل
عشقي فارض ليه الطّاعه
قدّامي واضح
شوقه في اعيونه لي فاضح
ينضح بالنّاضح
جاير والانضار جواعه

ياشوقه جاير
خلّف فيّا شوق مواير
داير ماداير
نحكيها ماهيش شجاعه
ماعنده زلّه
امكثِّر في طبعه ايتغلا
يارب اسملّه
نرعيله يازين اطباعه

خلّه يِدّلّل
مره يسكت مرّه ايهلِّل
يحرِّم وايحلِّل
في كيفه من غير قناعه

صابح ماسي
شوقه منّه ناسي.. ناسي
في راسي…. راسي
كاويني داير طبّــاعه

يامهما ايدير
قدره عالي دوم كبير
ينزل وايطير
سيّـوره يعرف من راعه

ماعندي غيره
نا عارف شرّه من خيــره
شــارب من بيــره
لكِنِّـي.. ماني تِبّـاعه