سالم العالم..
شفتني في اللوحة
رغم أن الطبيعة صامتة
وضربة الريشة قاسية
ولطخات من الاحمر
يوحن بمنظر دم
ساحت على اطراف القماش
وقصة غرامك واضحة ومفضوحة
بس شفتني في اللوحة
شفتني .. لما رسمتي
نقطة صفراء
في وسط لاند سكيب
حسيتني منك قريب
رغم الخضار المنتشر
وكبر المساحة الصافية المفتوحة
حقيتني في اللوحة
..
شفتني في ايديك
لطخات اكريلليك
وشوي من وهج الحبر
ع الكانفس مسفوحة
وفي صفحة الباليتا
واللون متخلط سواد وبياض
وزرقة بحر مخضر
وفرشتك ترسم شعر
وكل لون شارح روحه
انا شفتني في اللوحة
..
ومابين ضو وظل
وقصة نهار وليل
وذوبان الاكوريل
وسباتولا والوان مائية
والوان من الباستيل
وورق فابريانو
والوان ايروبراش
العمر مايحلاش
لو ما هناكش فن
لو مارسم رسام
لو مانحت نحات
ولو مانقش نقاش
ولو ما مزجنا الواننا بالحب
فوق سطح قماش
ولو ما نقشنا ارواحنا
علي تيلا مطروحة
ولو ماعيونك خبرن بشواش
قداش عندك حلم
لكن احلامك كلها مكبوحة
حسيتني ف اللوحة
..
انا شفتني في عيونك
تجريد مش تجريد
مرسوم بالوان الحديد
ومش واقعية فائقة
ومش لون بالتحديد
انا شفتني حفلة الوان
تحكي على الانسان
الشاعر مع الفنان
ماهناك شي بعيد
حتى الاسرار الغامضة مشروحة
وماهناك شي غريب
حتى الافكار الطايشة مسموحة
وماهناك شي جديد
الا ستاند وانت وانا
وضحكات مش مشبوحة
وحسيتني ساكن عيونك
ولعيون هي اللوحة
