بصوت يملؤه القهر، قال مواطن: سعر الدولار وصل لـ9.50 دينار، والدينار الليبي كل يوم يفقد من قيمته، المواطن شن ذنبه؟ راتبه هو نفسه، لكن كل شيء اصبح يرتفع، والقدرة الشرائية تطيح يوم بعد يوم.

وأضاف: حتى العلاج برا ليبيا اصبح صعب، كنت نمشي لتونس للفحوصات، والمراجعات، اليوم حتى الدينار التونسي يقارب 3 دنانير ليبية، والمريض اللي كان بالكاد يقدر يوفر تكاليف علاجه، اليوم حتى العلاج اصبح فوق قدرته.

وتابع بحرقة: المرتب ما زادش، لكن الأسعار زادت، الدواء زاد، الأكل زاد، السفر زاد، وكل شيء مربوط بسعر الدولار، والمواطن هو اللي يدفع الفاتورة، بينما المسؤول عنده كل الإمكانيات اللي تخليه بعيد عن هالمعاناة.

وأضاف: تعبنا من اقتصاد كل يوم أسوأ من اليوم اللي قبله، نبو نعرفوا: إلى متى؟ ومن المسؤول عن حماية قيمة الدينار وحياة المواطن؟

وختم رسالته: المواطن ما يبيش يعيش حياة المسؤولين، وما يطلبش رفاهية، يبي مرتبه يحفظ كرامته، وعلاجه يقدر عليه، وولاده يعيشوا بأمان، بلادنا فيها النفط والخيرات، لكن المواطن حاس إن خيرها بعيد عليه.

يا مسؤولين… المواطن الليبي ما عادش يتحمل، انهيار العملة مش رقم على الشاشة، هذا غلاء في السوق، وديون على الأسر، ومرضى يعجزوا على العلاج، وشباب تتأجل أحلامهم كل يوم.