•  عبدالرسول الحاسي

رنّ في مداه أشوي والصوت انحنى

ونظن انكسر معناه يا غويثاه

ولا عد عرف الكف لا خذ لا عطا

وطاح الحجر والظل طاح معاه

والجذع جذره موش في لبّ الثرى

في الوهم غارس، والوهم ماهاه

ومن دون مصدر صوت ميلاد الصدى

تما يصير، وهو العجب لله

وكلا شراب النهر متصعد جرى

عليك وقت قدامه مشا الوراه

والبنادم يناجي موش في رب السما

مناجي الميت في تراب وطاه

ودارت جناح،الريح تلعب في المدى

وبما فيه ما ينضح يريد أيناه

ومسيب القدر اليوم ويطيع في العصى

اللي حر باقي و الوصيف سواه

وصار الحرم و القدر مالهن شي عنا

ولا عد هناك والي على مبداه

ولا في خليل ولا حويمة في وفا

ورا المادة تجري عرا واكساه

وصار الحكم والراي في يدين النسا

وكمين بيت خارب من السنة انساه

ولا عز في سبيب الخيل لا عد في الوطا

ولا عد عمار البيت هي الرحاه

ولا عد محاور قوم في عوج اللغا

تهيب كل حد منها يرد بداه

ولا عد تجيب افلان سحنة لا الدما

وجدن محاور ما لها مسماه

والضان مامنه للذيب يرعى في الغذى

والكارهين وجهه رايمين قفاه

وكوت عزهم بكفله لاقاهم القا

ويريد يركبوه يرد خيل غزاه

اجواد غير في الشنة وفي زينة الكسا

ومشايخ الغاهم ماو حديث الغاه

على بهرجة الالقاب تبحث والثنا

وحتى زكاة الله مايش زكاه

وجارهم ضنا لاجواد قاصر ع الغدا

من غير الفلس عريان هو ووضناه

وتعبا عليهم قوم ويباتو خلا

عبا من علي باير اتدير عشاه

والعلم تما طعن في الدين والصلاة

والدين كل حد جاسر علي فتواه

وذابت اوجوه الناس في قلت الحياة

وصار الوهم سيد جميع ارجاه

وراس القلم من البدء يكتب في الفنا

وظهر الشيب ماو في الحرف في معناه