سالم العالم

بنغازي

 ياجرح مابطل نزف

يامدينة رغم صهد الشمس

من برد المواجع ترتجف

ياحكاية ما انتهى التاريخ منها

يا اسم ف الكون بالعز انعرف

قديش داينتي الدوائح فيك

وقديش هدهدنا الدفا في كفك

وماحد كافاك بوفاء

وماحد رجعلك سلف

قديش ماخط القلم في حبك

وقداش ما انكتبت عليك اشعار

وقداش ماغنى القمر لعيونك

وقديش من عاشق هواك وصف

واليوم شو اللي صار

من كافى دفاك بنار

من هو اللي يكتم ف انفاسك

نين صوت احلامك مبحوح

من هو اللي يفجر ف اطفالك

ومش داير قيمة للروح

ومن هو اللي يبيك تموتي

ومخلي قلبك مجروح

منين نلقالك امان

في صف جنب الصف

ومنين نلقالك حمام

فوق حيطانك يرف

ومنين نلقالك سلام

في كف تحضن كف

ومنين نلقالك كلام

يبكي معاك

يفرح معاك

يضحك معاك

يغضب معاك

وحبر الكلام نشف

لكن وحق الكاف والنون ومعاهن لآلف

كنّا ومازلنا هلك واهل البلاد ضناها

من وقتاً سكنّا ترابها واحنا دافعين كراها

لا نركعوا لا نولوا لا نهادنوا لا نذلوا

لو ينسفونا نسف

طرابلس

13 – 5 – 2013