- شعر محكي :: سالم العالم
واشواقنا ميعاد
والليل همسة خايفة
جيتي على أطراف الخريف
متسربلة بالصمت
مشحون فيك الكبت
لكن عيونك
باين عليها مرايفة
جيتي بعد ذاب المسا
وبيني وبينك ليل
والجرح ما حلا غفا
ولا زيت ف القنديل
والعمر عدى
كيف ما نك شايفة
متأخرة دهر وثمان جروح
وجسر المواعيد انكسر
سفح المسافات انحدر
شوق الحياة مذبوح
والغيم ما ف يده مطر
والروح مالها روح
وما عاد عندي للمواجع صبر
والورد متيبس عروقه صايفة
بودي نرمم ما تحطم فيا
بودي نلملم ما تحطم تهدم فيك
لكن أوجاعي مكبلا ت ايديا
وأنت الخوف المر
خضب كفوف ايديك
كيف نتفاهم كيف
كيف نتواعد كيف
نا جرح وانت شفرة
حتى بعد ما نلتقي
ميعادنا يجي طفرة
ودروبنا متباعدة
حتى الظروف مخالفة
ضي القمر صياد
وجروحنا ميلاد
وف القلب دمعة نازفة
