- إبراهيم علي عبدالله
مضايق مجال العقل جيت عجولي
لصاحب عزيز انريد يسمع قولي
جيت بضيقي
وين ما اضياقي جار شور رفيقي
صندوق سري وصاحبي الحقيقي
اللي دوم يفزع في رخاي وهولي
له جيت نحكي ما شكيت نقيقي
الشكوى لربي ايفك عني اوحولي
مو لكل حد يلمع ايبان بريقي
وعارف اصعودي موش كيف انزولي
وقاعد انصفي في الغثر من ميقي
رغم الغياظ المتكي الملولي
مازلت عارفها صحيح طريقي
ما نحصده قبل الطياب اسبولي.
جيته لافي
و باين عليا من بعيد اصيافي
حكيت له بما شايل خفاي الخافي
وحكالي بصفا لا قيل لا قالولي
وكيف مانبي القيته امعايا وافي
و خفف علي من ثقل شيل احمولي
واشربنا الشاهي وتم ضيقي طافي
وحسيت بالونس سقم جميع اميولي
وجاني الزها امرايف مثيل اريافي
غصبا عن اللي ما زها يبولي،،،
زينك صاحب
جيته وني م الضيق وجهي شاحب
عسري تهاون وين قال مراحب
ووين ابتسم طول ابتسمله زولي
ومن قبل مقيوله الصاحب ساحب
وصاحبي سحبني لين ربّح جولي
رفيقي الغالي
جيته بعد ما ضاق واجد حالي
امنين شد في ايدي تم ضيقي جالي
و لديار البشاشة امعاه تم اوصولي
الصحبة اللي لله خير ايوالي
ورفعة ومهابة وعز لو تصغولي
والصاحب الخيره رزق م المتعالي
الواحد اللي بنعودله ميمولي
كريم نطلبه ايحقق اللي في بالي
ويجعل الخير في كلمتي ومفعولي
