• د :: فريدة الحجاجي

موسوعة لا علمية تتناول مصطلحات اللهجة الليبية ولا تهتم بردة فعل القارىء

موضوع الحلقة : التصغير في اللهجة الليبية
لا يقتصر استخدام التصغير في اللهجة الليبية للدلالة على صغر الحجم او قلة العدد فقط وانما يتجاوز ذلك ليشمل مجالات اخرى بعيدة كل البعد ، فيُستعمل للشفقة وللاعجاب وللتدليع وللتحقير وللدلالة على قوة التأثير وكذلك للتهويل والتهديد ، لنرى معا ..

للدلالة على صغر الحجم :
❊ امس قطوستنا جابت اربعة قطيطيسات

وقلة العـدد :
❊ بين القتل والحوادث ما قعد من الليبيين الا حويرتين وزوز !

وللشـفقة :
❊ مشت صـرّفت دهيباتها باش تعالج بيـهم

وللاعجاب :
❊ عندها بنيّـات ما شالله عليهم زي العسـل

ولتدليع شخص ما :
❊ تي وينك ياعليـوة معاش ريناك؟

وللدلالة على قوة التأثير.. يُقال :
❊ يعطيه انقيطة تنقّطه هالعسكرسوسه !

اما استخدامات التصغير لغرض (التحقير) فهي متنوعة .. فيُقال :
❊ حطتلنا طويسة شاهي وكعيكات يابسات
❊ صاحبك هادا معنداش لا كليمة ولا موعـد
❊ ساكنين في حوش دويرتين ومطيبخ وعقاب حمام
❊ يحسـاب بقريشاته يقـدر ايديـر في النـاس ما يبّـي
❊ كل اللي جابه في البيان طويقم دهب وحديدات رقاق

واخيراََ للتهويل والتهديد :
❊ لو مشيت وما حطيتـش (لايـك) .. ايولّي انهّيرك أحرف ولويلتك امطّـوفة!

الى اللقـــــــاء