بصوت أنهكه التعب، قال احد المواطنين : اليوم حتى الخبزة اصبحت أزمة، تمشي للكوشة يقولك: ما فيش وقود، والكهرباء قاطعة، والإنتاج متوقف أو ناقص، باهي… المواطن شن يدير؟
وأضاف بمرارة: لا خبزة، لا مية، لا ضي، لا وقود… حتى أبسط مقومات الحياة اصبحت معاناة يومية، معقولة هذا يصير في دولة تملك كل هالخيرات من نفط وغاز؟
وتابع: والله ما عاد نعرفوا شن نديروا عشان تحسوا بينا، تعبنا من الطوابير، وتعبنا من الأعذار، وتعبنا من انتظار حلول ما تجيش.
كل يوم نصحوا على أزمة جديدة، وكأن المواطن مكتوب عليه يعيش في معركة أزمات في دولة من أغنى الدول النفطية.
وختم رسالته قائلاً: والله ما نحسدوش حد، وما نطمعوش في حياة المسؤولين ولا امتيازاتهم، نبيوا حقنا وبس… خبزة لأولادنا، وكهرباء في بيوتنا، ومياه لشيشماتنا، ووقود يقضي مصالحنا، وخدمات تحفظ كرامتنا.
هل صارت أبسط حقوق المواطن حلمًا بعيد المنال؟
