• د :: فريدة الحجاجي

موسوعة لا علمية تتناول مصطلحات اللهجة الليبية ولا تهتم لردة فعل القارىء

مصطلح الحلقة : (ايدير )
ومعناه “يفعل” في اللغة العربية ، والفعل الماضي (دار ) والفاعل (داير أو مداير )
هذا المصطلح لا يتمّ استخدامه وحيداً بل يأتي عادةً في جملة لوصف شخص أو لوصف سلوكه .. مثلاً :

– لوصف الشخص :
داير عملة : مذنب
داير حـالة : منفعـل
داير خشــم : متكبــر
داير ما في راسه : عنيـد
دايرة بيه الدواير : منكوب
داير في رويحتـه : متعجرف
داير بيه الزمان : سـيء الحظ 
داير في الناس شباشة : مشاغب
داير اللي ما ايديره واحد : منفلت 
دايرة في روحها طُـزّ عفنة : مغـرورة
داير بيه الدجاج الاسود : عكر المـزاج

– ولوصف السلوك : 
مداير روحـه : يتظاهـر
مدايرها سبلة : يتحجج بها
مدايرله حساب : يخشاه ويهابه
مداير فيها حالة : يسيء معاملتهـا
مداير عليهم دورة : يمرّ عليهم كلهم
مداير منها راسمال : بالغ في اهميتها
مدايرله الشـعر في لسانه : يقسـو عليه
مداير عليه كبيـدة : يحبـه ويحنـو عليـه
مدايرها خرص في ودنه : لا يعصى لها امراً
مدايرها عريانة : يقوم بفعلته على المكشوف

وتعج الامثال الشعبية الليبية بهذا المصطلح ..فيُقال :
دير الخيـر وارميـه ** ودير الشـر وراجيـه
اللي اديره في خوك ** ايديره فيك الزمان
اللي اديره في الرخيص ** تلقاه في الغالي

وفي الختام ،،
وكالمعتاد ننهي بشيء من الرومانسية .. قال الشاعر :

مانيش (داير ) غيرك **نين ننعمى والا انموت أسيرك
يا صاحب الغــــــلا
مانيش (داير) غالي **انت جديدي والقديـم والتالي💕

الى اللقـــــــاء