• د / فريدة الحجاجي

موسوعة لا علمية تتناول مصطلحات اللهجة الليبية ولا تهتم بردة فعل القارىء موضوع الحلقة : الشيباني (أو الشايب) ويقصد به الرجل المتقدم في العمر وقد يكون ذلك نسبةً إلى الشيب الذي يزحف على الشعر بتقدّم العمر، ولكن لحظة من فضلك أيها القارىء ..! ردّ بالك تعتقد أن بنادم يكبر وايولّي شيباني لمجرد أن سنوات عمره زادت أو لأن شعره اتغيّر لونه .. تبّي تعرف آمتى تخشّ (فعلياً) في مرحلة الشيخوخة ؟ تعالا شوف بنفسك : لما حدّ يناشبك .. تسكت وتقول معادش عندي جهد ولا نية في العراك. لما صغارك يكونوا ميتين بالضحك على نكتة وانت قاعد مبتسم لأنك أصلاً ما فهمتهاش. لما تتفرج على التلفزيون في الصقع لازم تحطّ بطانية على رجليك. لما تجي بحدا رجليك كورة صغار يلعبوا في الشارع .. تشبحلها وتواصل المشي. لما معادش تنوض في عقابات الليل اتدوّر في الثلاجة على طرف شوكلاطة لأنك خايف من القدّاد. لما المشي للطبيب والدواوات والتحاليل تولّي أكثر حاجة شاغلة تفكيرك. لما تخش للفراش باش ترقد وتكون لابس شخشير حتى لو كان الجو صيف. لما يسمعوك اتنخّط حتى لو رقدت في القايلة. لما اتولّي الموسيقا والأغاني الناشطة اتثيرلك في أعصابك. لما تحساب إن الآخرين “لازم” يسمعوا كلامك احتراماً ليك. لما تكون تلبس في نفس الألوان ونفس الموديلات متاع عشرة سنين فاتوا. لما كل ما اتجي تركب في السيارة أو تنزل منها لازم اتقول : استغفر الله. لما معادش اتعدّل لما حدّ يناديك يا (حاج) حتى لو عمرك ما حجّيت لما تهدرز مع أي حدّ لازم تجيبله سيرة ركابيك اللي مدايرة فيك حالة. لما تقعد تماكس في مولا دكان الخضرة على خاطر ربطة معدنوس لما ترفض اتجرّب أي أكلات غريبة أو جديدة. لما يوم العطلة تقعد بحوايج النوم لبعد المغرب. لما كل ما تكلم شاب لازم اتقوله احنا في وقتنا كنا افلح منكم. لما تقعد اتكدّس في الحاجات القديمة والخاربة في دار الخزين لأنك مش قادر تتخلص منها. لما تنسى تمشط شعرك وانت طالع لما تكون معجب بوحدة وتبي تعاكسها تقوللها معادش اتقوليلي يـ (أستاذ). لما تكون ما زلت مقتنع إن سميرة توفيق أحلى من نانسي عجرم. لما تسمع الأغاني الرومانسية وكأنك تسمع في نشرة الأخبار .. الزوز ليهم نفس التأثير. لما قاعد تحساب إن الوجه “المتجهم” يعطي فيك في كاريزما ووقار. لما معادش تعرف علاش مرتك متغششه وطايرتلها منك طول الوقت. لما تخش لمكان فيه ناس مقعمزين ينوض واحد ويعطيك مكانه. لما ينطفى الموبايل متاعك بدون سبب تقعد نفص ساعة اتدّور كيف تشعله مرة ثانية. لما تحساب نفسك تفهم في التكنولوجيا لمجرد إن عندك حساب على الفيسبوك. لما تقعد اتدّور على مفتاح سيارتك تحت الكرسي وهي والعة. لما قاعد عندك الاعتقاد إن البصارة والضحك من قلة الأدب ! إلى اللقـــــــاء. الحياة تبدأ بعد الستين. فريـدة.