• شعر محكي :: محمود السالمي

ياحبيبة ..
اسمحي لي انقولها والعيد قررب ..
والاماني .. كالشراعات استعدت ..
ساقها هب النسيم ..
بعد ما شرق وغرب ..
والافق .. مغري وهادي ..
عكس طبعه موش عادي ..
من حكاياته تهرب .
والكؤوس اللي تخفت ..
طالها بعض التمادي ..
وانت .. يا حبة فؤادي
يا غلا عمرا تمرد ..
زي ما كنت .. جميلة ..
ومانبيش انقول سمحة ..
وواخذة من الشط لمحة ..
في سعة شطه عيونك ..
وفي ارتكاز الشوق رمحه ..
في انبهاري .. في ذهولي
وقت شوقي ..
وقت خطيت القصيدة ..
ومن ورا النظرات نمحى ..
ويشهد الله .. المحبة ..
كانها ماجت قبالك ..
موش سمحة ..
وناقصة .. جنونك وطيشك
واستعادة روحنا لحظة لقانا ..
وقت ما تبي تقولي ..ياحبيبي
وقتنا منك تسرررب ..
ساكتة والعيد قرررب ..
………………………

اسمحي لي يا حبيبة ..
هذه المرة الوحيدة ..
موش عارف ليش جيتك
والزمن .. ما عاد عندي ..
وكل ما نبي نقولك في قصيدة
تغلب اللهفة كلامي ..
والاماني تخون ودي ..
قرررب العيد .. اسمحي لي ..
شي من روحي هدية ..
وشي من شوقي تخفي ..
وشي من عطرك غراني
شي ليا مش عليا ..
نقولها .. راني نحبك .. مش جديدة ..
بس هالمرة الوحيدة ..
قررب العيد اسمحي لي ..
نقطف الورد فخدودك ..
ينثني ريان عودك ..
ويتلاشي كل شي ..
ماعدا انت ووجودك ..
واسالي ….عاشق مجرب ..