عبدالرسول محمد
اسنين الوجع مرن اثقال علينا
تح توت اللهايب والعدو غازينا
مرن امرور اثقال
على وطنا في أيام الاحتلال
تهجير للعرب والسجن بالاقفال
وذلو انفوس اخيارهم غاشينا
ما ينتسن شينك اسنين اكلال
لهن غل كامن في الصدور دفينا
دون الشرف والوطن موت حلال
هذى بشرع ماو ذاكر الله ونبينا
فوق من بنات الريح خير ارجال
ارتسمن ملاحم شرفن ماضينا
______
مرن اسنين سواد
علي وطنا وجملة ضنا لاجواد
ركابة طويل البتع فالملهاد
الخايل بجرجاره وقصرة قينه
طيب اسلافه ساعة الجهاد
ما كهّبه كثر الرصاص زنينه
في خشم دقرا وفي اصروع جواد
مرسوم عزنا طبّعن عليهن دينا
نهارهن اللي غازي غزا البلاد
املاح من تنابوا للفزع في حينه
براكين ثابن من اسنين خماد
وربك امبارك والعدو جلينا
اسنين تنذكر ديما وما تنعاد
فيهن العبرة م الزمان خذينا
ودار مزنها غربي وغيثه جاد
وجا سيل يقحش في الحجر والطينة..
وانعنهن ايتمن هالسنين ارغاد
لا ايشح ماهن لا اتخص خزينة
