- عادل الجبراني
سَمٌي يا غزة بإسم الله
وربي عنك ما يتخلى
سمي يا غزة
بإسم المولى رب العزة
عندك وسط القلب معزة
إسمك عالي و زاد تعلى
المحتل جيوشه مهتزة
شوي مرتزقة ليس إلا
سمي يا غزة بإسم الله
معاك المولى
و انت في الشهادة الاولى
خذلوك تسعطاش دولة
و حكام احترفو المذلة
تواتي فيهم هاك القولة
شلة لا دين و لا ملة
للغرب أكيد
يعيشوا و يموتو عبيد
الانجاز الثوري الوحيد
تنديد فورقة مجلة
واش باش يفيد التنديد
و انتم هم سبب العلة
وجوه النفاق
شوفوا الغزاوي العملاق
تقول مسافر عالبوراق
في الجدار مسوي فلة
مرة خارج مالانفاق
و مرة هابط بالمظلة
دروس و تتقرا
لأجيال لداخل و لبرا
و الله ياغزة هالمرة
بإعتراف العالم كله
انت في حصارك حرة
و احنا البلدان المحتلة
انت المنتصرة
و انت الحرة و احنا الأسرى
و جيوش الأمة يا حسرة
كثرة و وقت الرسمي قلة
و حدك دافعتي عالمسرى
وين أسرى الرسول و صلى
كل المعالم
دنسها الكيان الظالم
ما يخرج صهيوني سالم
من القدس و غزة و راملا
و إنت أثبتي للعالم
قوانين العالم مختلة
سمي يا غزة بإسم الله
و ربي عنك ما يتخلى
