شعر محكي :: محمد الدنقلي

نكرهك .. وحق حبك نكرهك ..
مش لأني نكرهك .. أو غرامي فيه شك ..
بس هالكلمه الرّهيبه .. قاسيه .. كيف حبي لك ..

نكرهك فوق الكريهه .. وكل يوم نقول فيها ..
للّي ماشي ، وللّي جاي ، وللّي عاقل ، والسفيهه .
المحبه .. ما عرفت نْبوح بيها ..
والحكايه .. ما لقيت حروف ليها ..
لَجل حبَّك يختلف عن أيّ حب ..
في حياتي ما اتصَّادفت بشبهه ..
لَجل روحك تختلف عن أيّ روح ..
خفْت منها ، وخفْت من عيني عليها ..
كيف بنْسمّي غرامك ..
والأسامي عاجزه إنها تسمّي ؟
كيف بنْصوّر غرامك ..
وأنا كلامي تاه بين صوتي وفمّي ..
والبديله .. كل ليله … نكرهك ..
مش لأنّي نكرهك .. أو غرامي فيه شك ..
بس .. هالكلمه الرّهيبه ..
قاسيه .. كيف حبي لك … نكرهك …
من ديوان / أبصر كيف .. 2006